काठमाडौं– नेपाली कांग्रेसले पार्टीका सम्पूर्ण नेता–कार्यकर्ताहरुलाई पूर्वसभापति स्व. गिरिजाप्रसाद कोइरालाको तस्बिर सामाजिक सञ्जालमा अनिवार्य रुपमा पोस्ट गर्न आग्रह गरेको छ । 

पूर्वप्रधानमन्त्री कोइरालाको शताव्दी जन्म जयन्तीको पूर्वसन्ध्यामा अनिवार्य रुपमा तस्बिर फेसबुक लगायतका सामाजिक सञ्जालमा पोस्ट गर्न कांग्रेसले नेता-कार्यकर्ताहरूलाई आग्रह गरेको हो । 

जन्म जयन्तीको अवसरमा मंगलबार आयोजना हुन लागेको ‘क्रान्तिदेखि शान्तिसम्म ऐतिहासिक फोटो प्रदर्शनी’ बारे जानकारी दिन आयोजित पत्रकार सम्मेलनमा सूचना विभाग प्रमुख मीन विश्वकर्माले पूर्वसभापति कोइरालाको तस्बिर पोस्ट गर्न आग्रह गरिएको जानकारी दिए । 

विश्वकर्माले नेता–कार्यकर्ताहरुलाई सोमबार बेलुकी ठिक ८ बजे एकसाथ तस्बिर राख्न पनि आग्रह गरे ।

 ‘नेपाली कांग्रेसका सबै तहका नेताहरुले, पार्टी सदस्यहरुले भ्रातृ संस्थाका सदस्य तथा शुभेच्छुक साथीहरूले गिरिजाबाबु सम्बन्धि, सकिन्छ भने आफू पनि भएको, भएन कार्यक्रममा सहभागी भएको, त्यो पनि भएन भने गिरिजाबाबुमात्रै भएको फोटो सामाजिक सञ्जालमा ठ्याक्कै ८ बजे पोस्ट गर्ने हामीले कार्यक्रम बनाएका छौं,’ उनले भने, ‘यो बारे हामी परिपत्र गर्दैछौँ ।’