नयाँ दिल्ली- भारतले भुक्तानी प्रणाली स्थापना गर्नका लागि सहकार्य गर्ने विषयमा मध्य एसियाली मुलुकहरुसमक्ष प्रस्ताव पेश गरेको छ । भारत–मध्य एसियाली राष्ट्रिय सुरक्षा सल्लाहकारहरुको दोस्रो बैठकका क्रममा भारतीय राष्ट्रिय सुरक्षा सल्लाहकार अजित दोभालले यस्तो प्रस्ताव गरेका हुन् ।

कखाजस्तानमा भएको उक्त बैठकमा राष्ट्रिय सुरक्षा सल्लाहकार दोभालले हरेक मुलुकको आवश्यकता अनुसार सार्वभौम, डिजिटल ‘रियल टाइम’ भुक्तानी प्रणालीको विषय अघि सारेको भारतीय समाचार संस्था इन्डियन एक्सप्रेसले जनाएको छ ।

उनले यसबाट भारत र मध्य एसियाली मुलुकहरुबीच व्यापारिक सम्बन्ध विस्तार हुने भन्दै भुक्तानी प्रणालीको विकास भएमा भारतमा स्वास्थ्य उपचारका लागि भारत जाने मध्य एसियाली मुलुकका नागरिकलाई सहज हुने बताए ।

त्यसबाहेक मध्य एसियाली मुलुकहरुमा रहेका भारतीय व्यवसायी तथा विद्यार्थीलाई पनि सहयोग पुग्ने उनले बताए । उक्त बैठकमा आतंकवादको जोखिमबारे पनि छलफल भएको इन्डियन एक्सप्रेसले जनाएको छ ।