काठमाडौं– पाठेघरको मुखको क्यान्सरबारे जनचेतना अभिवृद्धि गराउने उद्देश्यले ग्राण्डी इनटरनेशनल हस्पिटलमा सचेतना कार्यक्रम सम्पन्न भएको छ ।

 आज काठमाडौंका विभिन्न विद्यालयका कक्षा १० देखि १२ मा अध्ययनरत किशोरीहरूलाई अस्पतालका स्त्री तथा प्रसूति रोग विशेषज्ञ डा पद्मराज पन्तले पाठेघरको मुखमा हुने क्यान्सरको प्रारम्भिक निदानका महत्वबारे बताएका थिए । 

डा. पन्तले महिलाहरूको पाठेघरको परिक्षण गर्दा १ सय जनामा ५ जनामा पाठेघरको मुखको क्यान्सर देखिएकोले रोक्न र उपचार गर्नको लागि ग्राण्डी अस्पतालले विभिन्न स्कुल कलेज तथा स्थानीय निकायहरूसंग समन्वय गर्दै जनचेतना अभिवृद्धि गर्ने कुरामा अघि बढ्ने बताए ।

समयमै पाठेघरको मुखको क्यान्सर थाहा पाए उपचार गर्न सकिन्छ र यसको जानकारी भए रोकथाम समेत गर्न सकिन्छ भन्ने जानकारी आवश्यक भएको बताए । गाउँ देखि सहर सम्म जनचेतना जगाउनु आवश्यक रहेको र बिकसित देशमा भन्दा अल्पविकसित देशमा यो रोग बढ्दै गएको डाक्टर पन्तको भनाई छ  ।

उनले पाठेघरको क्यान्सर पत्ता लगाउन महगों नभएको र कम खर्चमा गर्न सकिने भएकोले मुख्य कुरा सबैलाई चेतना फैलाउनु आवश्यक रहेको बताए ।