काठमाडौँ– प्रधानमन्त्री कप महिला टी–२० राष्ट्रिय क्रिकेट प्रतियोगितामा मधेस प्रदेशले पहिलो जित निकालेको छ । मूलपानीस्थित माथिल्लो क्रिकेट मैदानमा भएको खेलमा गण्डकी प्रदेशलाई २७ रनले हराउँदै मधेसले पहिलो जित दर्ता गरेको हो ।

मधेसले दिएको १ सय १३ रनको लक्ष्य पछ्याएको गण्डकी १९ ओभर ४ बलमा अलआउट हुँदै ८५ रनमा समेटियो । गण्डकीका सुमन खतिवडाले सर्वाधिक ४२ रन जोडिन् । यस्तै, सृष्टि जैसीले १५ रन बनाइन् भने अन्य खेलाडीले दोहोरो अङ्क जोड्न सकेनन् ।

मधेसकी पूजा महतोले तीन तथा सरस्वतीकुमारी चौधरी, कविता गौतम र साक्षी यादवले एक–एक विकेट लिए ।

यसअघि, टस हारेर पहिले ब्याटिङ गरेको मधेसले निर्धारित २० ओभरमा ७ विकेटको क्षतिमा १ सय १२ रन बनाएको थियो । मधेसकी पूजा महतोले ३८, सरस्वतीकुमारी चौधरीले २६ तथा प्रतिमा साहले १० रन बनाए ।

गण्डकीकी सुमन खतिवडाले तीन तथा कुसुम गोदार र सृष्टि जैसीले एक–एक विकेट लिए ।

यो जितसँगै मधेसले ४ खेलबाट दुई अंक जोडेको छ भने गण्डकीको पनि दुई अंक नै रहेको छ ।