काठमाडौँ– नेपाली राष्ट्रिय क्रिकेट टोलीका पूर्वकप्तान सन्दीप लामिछानेविरुद्ध बलात्कार मुद्दाको पेसी काठमाडौँ जिल्ला अदालतका न्यायाधीश शिशिरराज ढकालको इजलासमा तोकिएको छ ।

आजको पेसी सूचीमा उक्त मुद्दा पहिलो नम्बरमै परेको छ।

नाबालिग बलात्कारको कसुरमा २०७९ कात्तिक १४ गते काठमाडौँ जिल्ला अदालतमा क्रिकेटर लामिछानेविरुद्ध मुद्दा दायर भएको मुद्दामा आज अन्तिम सुनुवाइ हुने बताइएको छ ।

सन्दीप दोषी ठहर भए उनी कम्तीमा १० वर्ष जेलमा बस्नुपर्नेछ। मुलुकी अपराध संहिताको दफा २१९ को उपदफा २ अनुसार १८ वर्ष नपुगेकासँग सहमतिमै यौन सम्बन्ध राखे पनि त्यसलाई बलात्कार मानिने र दोषीलाई १० देखि १२ वर्षसम्म जेल सजाय हुने उल्लेख छ।

यसअघि सो मुद्दा पेसीमा चढेर पनि लामो समयदेखि पटक पटक सर्दै आएको थियो । यो मुद्दामा जिल्ला अदालतले मगाएका सबै कागजात प्राप्त भइसके पनि सुनुवाइ भने सर्दै आएको थियो ।

सर्वोच्च अदालतले यसअघि गत फागुनमा चाँडो फैसला गर्न आदेश दिएको भए पनि अहिलेसम्म फैसला हुन सकेको छैन ।

गत मंसिर २४ गते न्यायाधीश पदमराज पाण्डेको इजलासमा पेसी चढे पनि सन्दीप पक्षका वकिलले निवेदनमार्फत स्थगित गराएका थिए ।