तुलसीपुर– तुलसीपुरमा खुकुरी प्रहारबाट एक महिलाको मृत्यु भएको छ भने दुई जना घाइते भएका छन् । 

शनिबार दिउँसो साढे २ बजेको समयमा तुलसीपुर उपमहानगरपालिका वडा नं. ११ बेलटाकुरास्थित भगवती टोल बस्ने करिब ३८ वर्षीय टेक बहादुर हमालले खुकुरी प्रहार गर्दा करिब ४२/४३ वर्षीया रिता हमालको घटना स्थलमै मृत्यु भएको इलाका प्रहरी कार्यालय तुलसीपुरले जनाएको छ ।

हमालले आफ्नै घरबाट धारिलो हतियार खुकुरीले रितालाई घाटीमा खुकुरी प्रहार गर्दा उनको घटना स्थलमै मृत्यु भएको प्रहरीले जनाएकाे छ । खुकुरी प्रहारबाट सोही ठाउँका ४५ वर्षीय बीर बहादुर हमाल र ६५ वर्षीया कमला कुमारी हमाल घाइते भएका छन्  । 

उनीहरूको अहिले राप्ती प्रादेशिक अस्पताल तुलसीपुरमा उपचार भइरहेको  प्रहरीले जनाएको छ  । प्रहरीले खुकुरी प्रहार गर्ने टेक बहादुर हमाललाई उनकै घरबाट नियन्त्रणमा लिएको छ ।