काठमाडौं– चीन भ्रमणमा रहेका प्रधानमन्त्री पुष्पकमल दाहाल प्रचण्ड र चीनका राष्ट्रपति सी जिनपिङबीच शनिबार भेटवार्ता भएको छ ।

शनिबार नै अमेरिकाको न्यूयोर्कबाट चीन पुगेका प्रचण्डले एसियाली खेलकुद आयोजना भएको शहर हाङजाउमा चिनियाँ राष्ट्रपति सीसँग भेटवार्ता गरेका हुन् ।

प्रधानमन्त्री प्रचण्ड आजै १९औँ एसियाली खेलकुदको उद्घाटन समारोहमा सहभागी हुनेछन्। त्यसपछि उनी बेइजिङ जाने कार्यक्रम छ। साताव्यापी भ्रमणका क्रममा चीन पुगेका प्रधानमन्त्री प्रचण्डलाई हान्जाउमा भव्य स्वागत गरिएको थियो। अमेरिकामा संयुक्त राष्ट्रसंघको ७८औँ महासभामा सहभागी भएर उनी आजै चीन पुगेका हुन्।

हान्जाउ विमानस्थलमा चीनका खेलकुद सामान्य प्रशासनमन्त्री तथा चिनियाँ ओलम्पिक समितिका अध्यक्ष गाओ झिदानले प्रचण्डलाई स्वागत गरेका थिए।

चीन र नेपालको टोलीबीच प्रतिनिधिमण्डलस्तरको छलफल पनि भएको छ । एक हप्ता चीनमा रहने प्रचण्ड प्रचण्ड हाङ्जाउबाट बेइजिङ जाने र त्यहाँ प्रधानमन्त्रीसँग भेटवार्ता गर्ने कार्यक्रम पनि छ ।

त्यस्तै उनले नेपालसँगको सीमा क्षेत्र तिब्बत पनि भ्रमण गर्ने कार्यक्रम रहेको छ ।