काठमाडौँ– वेस्टइन्डिजले इंग्ल्याण्डविरुद्धको टी–२० सिरिज जितेको छ । गएराती सम्पन्न सिरिजको अन्तिम खेलमा वेस्टइन्डिज ४ विकेटले विजयी भएसँगै सिरिज ३–२ ले जितेको हो ।

इंग्ल्याण्डले दिएको १३३ रनको लक्ष्य पछाएको वेस्टइन्डिजले १९ ओभर २ बलमा ६ विकेट गुमाउँदै लक्ष्य पूरा गरेको हो ।

वेस्टइन्डिजका लागि शाई होपले अविजित ४३ रनको योगदान गरे । यसैगरी, शेर्फान रादरफोर्डले ३०, जोनसन चार्ल्सले २७ र निकोलस पुरनले १० रन बनाए ।
इंग्ल्याण्डका आदिल राशिद र रिस टोप्लीले दुई–दुई तथा क्रिस वोक्स र साम करनले एक–एक विकेट लिए ।

यसअघि पहिले ब्याटिङ गरेको इंग्ल्याण्डले  १९ ओभर ३ बलमा अल आउट हुँदै १ सय ३२ रन बनाएको थियो ।

योसँगै पाँच खेलको टी–२० सिरिज वेस्ट इन्डिजले ३–२ ले जितेको छ । यसअघि वेस्टइन्डिजले ४ विकेट र १० रन तथा इंग्ल्याण्डले ७ विकेट र ७५ रनको जित निकालेका थिए । यस सिरिजको प्लेयर अफ द सिरिज फिल साल्ट बनेका छन् ।