काठमाडौं– काठमाडौंस्थित भृकुटीमण्डपमा नेपाल पुस्तक तथा स्टेसनरी व्यवसायी महासंघ र करेन्ट मिडियाले संयुक्त रुपमा पुस्तक प्रदर्शनीको आयोजना गरेका छन् । जारी नवौँ संस्करणको प्रदर्शनीमा १५ देशले स्टल राखेका छन् ।

‘सामाजिक रुपान्तरणका लागि शिक्षामा नयाँ अभियान’ मूल नाराका साथ यो प्रदर्शनी पढ्ने बानीको विकास गर्न गरिएका हो ।

नेपाली भाषाका किताब चिनियाँ र चिनियाँ भाषाका किताब नेपाली अनुवादमा पाइनु यो प्रदर्शनीको प्रमुख सौन्दर्य रहेको महासंघका पूर्वअध्यक्ष मनहरि बस्याल बताउँछन् ।

बस्याल भन्छन्, ‘हामीले यो प्रदर्शनीमा केन्द्रका नेताहरु र स्थानीय तहका नेतालाई बोलाएर अन्तर्वार्ता पनि गराउँछौं । त्यस कार्यक्रममा चाहिँ उनीहरुले कार्यकर्तामा पढ्ने वातावरण कत्तिको छ र कसरी उनीहरुमा पढ्ने बानीको विकास गराउँने त्यसमा केन्द्रित हुनेछ ।’

सो कार्यक्रम अन्तर्वार्ता सेगमेन्टअन्तर्गत राखिएको बस्यालले जानकारी दिए ।

त्यस्तै, पछिल्लो समय यस प्रदर्शनीमा पाठकहरुलाई आकर्षण गरिरहेको किताब ‘समयक्रममा नेपाल’ हो । २४ हजार मूल्य भएको यो किताब प्रदर्शनीकै सबैभन्दा महँगो हो । आकर्षणको मुख्य कारण नै यसको मूल्य हो ।

पाँच दिनसम्म चल्ने यो प्रदर्शनी बुधबार दोस्रो दिनमा जारी छ । प्रदर्शनीमा १८० वटा स्टल छन् ।

हेर्नुहोस् तस्बिरहरु

तस्बिरहरु- संगम ढकाल