काठमाडौं – न्यायपरिषद्को सिफारिसमा संसदीय सुनुवाइ समितिको अनुमोदनपछि सर्वोच्च अदालतमा ६ न्यायाधीश नियुक्त भएका छन् ।

न्यायपरिषद्ले ५ मंसिरमा सर्वोच्च अदालतको न्यायाधीश सिफारिस गरेको थियो ।

शुक्रबार, आइतबार र सोमबार २/२ जनाको सुनुवाइ गरेको समितिले समितिमा प्राप्त उजुरी र न्यायाधीशले दिएको जवाफ र कार्ययोजनाबारे अध्ययन गर्न सदस्यहरुलाई दुई दिनको समय दिएको थियो ।

अनुमोदन गर्ने वा नगर्ने निर्णय लिन आज विहान ११ बजे समितिको बैठक बोलाइएको थियो ।

१५ सदस्यीय समितिको बैठकमा ११ जना सांसद मात्र उपस्थित थिए । बैठकमा सांसदहरुले समितिमा परेका उजुरी र न्यायाधीशको जवाफबीच मेल खाए नखाएको मूल्यांकन सुनाएका थिए । सांसदहरुको रायपछि समितिबाट न्यायपरिषद्ले सिफारिस गरेका सबै न्यायाधीशको नाम अनुमोदन गरेको हो ।

समितिको अनुमोदनपछि राष्ट्रपतिले सर्वोच्चको न्यायाधीशहरूमा सारङ्गा सुवेदी, अब्दुल अजिज मुसलमान, महेश शर्मा पौडेल, टेकप्रसाद ढुङ्गाना, सुनीलकुमार पोखरेल र बालकृष्ण ढकाललाई नियुक्त गरेका हुन् ।

नवनियुक्त न्यायाधीशको शपथ भोलि हुनेछ । सर्वोच्चमा अझै एक न्यायाधीश पद रिक्त छ ।