काठमाडौँ– प्रतिनिधिसभा अन्तर्गतको उद्योग तथा वाणिज्य र श्रम तथा उपभोक्ता हित समितिले बजार अनुगमनमा एकरूपता ल्याउनेगरी कार्ययोजना बनाएर पेश गर्न केन्द्रीय बजार अनुगमन समितिलाई निर्देशन दिएको छ ।

सिंहदरबारमा बुधबार बसेको समिति बैठकले तीनै तहका कानूनमा एकरूपता ल्याउँदै बजार अनुगमन प्रभावकारी बनाउनका लागि आवश्यक कार्ययोजना बनाएर समितिसमक्ष पेश गर्न केन्द्रीय बजार अनुगमन समितिलाई निर्देशन दिएको दिएको हो ।

बजार अनुगमनका लागि संघ प्रदेश र स्थानीय तहको कानूनमा एकरूपता नभएका कारण अनुगमनमा समस्या र प्रभावकारी हुन नसकेकाले प्रभावकारी रुपमा अनुगमन गर्नका लागि कार्ययोजना बनाएर पेश गर्न निर्देशन दिइएको समिति सभापति अब्दुल खानले जानकारी दिए ।

उनले उपभोक्ताको हक अधिकार स्थापित गर्न मौजुदा कानूनमा संशोधन गर्नुपर्ने विवरण समितिलाई पठाउन उद्योग मन्त्रालयलाई निर्देशन दिएको उनले बताए । उनले अनुगमनलाई प्रभावकारी बनाउन दक्ष जनशक्ति व्यवस्थापन गर्नुपर्ने भएकाले दक्ष जनशक्ति राख्न गर्नुपर्ने व्यवस्थाका बारेमा पनि जानकारी गराउन उद्योग मन्त्रालयलाई निर्देशन दिएको सभापति खानले बताएका छन् ।

त्यस्तै बैठकले उदयपुर र हेटौँडा सिमेन्ट उद्योग सञ्चालनका लागि देखिएका समस्याहरूका बारेमा जानकारी गराउन पनि उद्योग मन्त्रालयलाई निर्देशन दिएको छ ।