काठमाडौँ- ५ सय किलोग्रामभन्दा बढी पटाकासहित एक जना पक्राउ परेका छन् । पक्राउ पर्नेमा बाराको कलैया घर भइ हाल ललितपुरको सानेपा बस्ने २८ वर्षीय जितेन्द्र कुमार जैसवाल रहेका छन् ।

केही व्यक्तिहरूले गैरकानूनी रूपमा भारतबाट पटका, भुइचम्पालगायतका आतिसबाजीजन्य विष्फोटक पदार्थहरू ल्याई भण्डारण गरेर कारोबार गर्ने गरेको भन्ने गोप्य सूचनाको आधारमा काठमाडौँ उपत्यका अपराध अनुसन्धान कार्यालयबाट खटिएको प्रहरी टोलीले उनलाई पक्राउ गरेको हो ।

उनलाई शनिबार ललितपुरको कुपण्डोल कानदेवतास्थानबाट पक्राउ गरिएको प्रहरीले जनाएको छ । उनलाई विष्फोटक पदार्थसम्बन्धी कसूरमा आवश्यक अनुसन्धान तथा कारवाहीको लागि जिल्ला प्रहरी परिसर ललितपुरमा पठाइएको छ ।