काठमाडौं- राष्ट्रियसभाका अध्यक्ष गणेश तिमिल्सिनाले कानुनमा उल्लेख समान अधिकार र सहभागिताका विषयलाई व्यवहारमा लागू गर्नुपर्ने बताएका छन् ।

महिला, कानुन र विकास मञ्चले मंगलबार काठमाडौंमा आयोजना गरेको ‘पूर्ण नागरिक पूर्ण अधिकार : नागरिकतामा समान अधिकार’ विषयक कार्यक्रममा उनले नेपालमा कानुन र व्यवहारमा प्रयोग गर्ने अभ्यास फरक देखिएको भन्दै कानुनमा उल्लेख भएका विषयलाई व्यवहारमा लागू गर्नुपर्ने बताएका हुन् ।

कतिपय विकसित मुलुकमा कानुनमा नलेखे पनि व्यवहारमा समानताको विषय कार्यान्वयन भइरहेकोले सरोकारवाला पक्ष गम्भीर हुनुपर्ने उनको भनाइ छ । अध्यक्ष तिमिल्सिनाले आरक्ष र विशेष अधिकारलाई निश्चित समयका लागि मात्रै कार्यान्वयन गर्ने र त्यसपछि प्रतिस्पर्धालाई प्राथमिकता दिनुपर्ने धारणा पनि राखे ।

कार्यक्रममा मञ्चका कार्यकारी निर्देशक सबिन श्रेष्ठले संविधानमै लेखिएको विषय कार्यान्वयनका लागि कानूनको अभाव हुने अवस्थालाई अन्त्य गर्नुपर्ने बताए ।