काठमाडौँ- विश्व शौचालय दिवस नेपालसहित विश्वभर जनचेतनामूलक कार्यक्रम गरी मनाइएको छ ।

यस वर्ष विश्व शौचालय दिवसको नारा ‘परिवर्तनलाई बढावा दिऔँ’ भन्ने रहेको छ । नेपाललाई २०७६ सालको असोज १३ गते नै खुला दिसामुक्त देश घोषणा गरिएको छ ।

तर पनि सबै नेपालीहरुमा शौचालयको पहुँच पुग्न सकेको छैन । नेपालमा अझै पनि झण्डै साढे ५ प्रतिशत जनसंख्यामा शौचालयको अभाव रहेको एक तथ्याङ्कले देखाएको छ ।

काठमाडौँ उपत्यकामा विभिन्न स्थानमा सार्वजनिक शौचालय रहेपनि अप्याप्त रहेको नागरिकहरुको गुनासो छ । संयुक्त राष्ट्रसङ्घका अनुसार विश्वका साढे ३ अर्ब मानिसहरु अझै पनि शौचालयको सुविधाबाट बञ्चित छन् । खुला दिसा र पिसाबका कारण फैलने रोगले विश्वभर दैनिक एक हजार बालबालिकाको ज्यान जाने गरेको तथ्याङ्क रहेको छ ।