काठमाडौँ– भारतको जम्मु कश्मीरका एक बालकले अण्डाबाट चल्ला उत्पादन गर्ने नयाँ ‘इन्क्युबेटर मेसिन’ को विकास गरेका छन् । जम्मु कश्मीरको कुलगामका १० वर्षीय बालक मोमिन इशाकले यस्तो मेसिनको विकास गरेका हुन् ।

हाल कक्षा २ मा अध्ययनरत इशाकले दुई वर्षको प्रयासपछि यस्तो ‘इक्युबेटर’ मेसिनको विकास गरेका हुन् । उनले विकास गरेको मेसिनले भविष्यमा पोल्ट्री व्यवसायलाई किफायती बनाउने अपेक्षा गरिएको छ ।

भारतीय समाचार संस्था एएनआईका अनुसार स्थानीय कुखुरा व्यवसायी र साना किसानहरूलाई फाइदा होस् भन्ने आफ्नो उद्देश्य रहेको उनको भनाइ छ । आफूले बजारमा रंगीन चल्ला देखेपछि इन्क्युबेटर बनाउने सोच आएको उनले जानकारी दिए ।

मोमिनका बुबा मोहम्मद इशाक तेली भने यति सानो उमेरमा आफ्नो छोराले इन्क्युबेटर विकास गरेकोमा दंग छन् । उनले आफ्नो छोराले यस्तो मेसिन बनउन कडा मेहनत गरेको सुनाए ।