काठमाडौँ– भौतिक पूर्वाधार तथा यातायात मन्त्री प्रकाश ज्वालाले कांग्रेसका सांसद संजय गौतमलाई अनशन तोड्न आग्रह गरेका छन् । 

बुधबार मन्त्रालयमा पत्रकार सम्मेलन गर्दै मन्त्री ज्वालाले बबई नदीमाथि बनेको जब्दीघाटको भत्किएको पुल पुनः निर्माण गर्ने प्रक्रिया अघि बढिसकेको भन्दै अनशन तोड्न आग्रह गरेका हुन् ।

जब्दीघाटको भत्किएको पुल निर्माणको काम शुरु गर्नुपर्ने डुबान र कटानको कारण जोखिममा रहेका स्थानमा तटबन्धका काम गर्नुपर्ने र सिँचाइ आयोजनामा बजेट सुनिश्चित हुनुपर्ने माग राख्दै सांसद गौतम अनशन बस्दै आएका छन् । मन्त्री ज्वालले पुल निर्माणका लागि प्राविधिक परिक्षण भइसकेको भन्दै नयाँ पुल बनाउन १० दिनभित्र ठेक्का आह्वान गर्ने जानकारी दिए ।

उनले यसअघि भौतिक पूर्वाधार मन्त्रालयसँग जोडिएको आयोजनाहरूको म्याद सकिने बेलासम्म काम सम्पन्न नगर्नेहरूलाई आयोजनाबाटै हटाउने बताए । मन्त्रालयले जनताले प्रत्यक्ष उपभोग गर्न पाउनेगरि विकासका आयोजनालाई छिटै सम्पन्न गर्न तत्परताका साथ काम गरिरहेको उनले बताए ।