काठमाडौँ- सोमबार बिहान फेला परेको दुर्घटनाग्रस्त यती एयरलाइन्सको ‘ब्लाक बक्स’ थप अनुसन्धानका लागि छानबिन आयोगलाई जिम्मा लगाइएको छ ।

आइतबार बिहान दुर्घटना भएको विमानको ‘ब्लाक बक्स’ सोमबार भेटिएपछि छानबिन समितिलाई जिम्मा लगाइएको हो । नागरिक उड्डयन प्राधिकरणका प्रवक्ता जगन्नाथ निरौलाका अनुसार आइतबार गठन भएको छानबिन आयोगले आजैबाट काम सुरु गरेको छ ।

विमान दुर्घटनामा ‘ब्लाक बक्स’ लाई महत्वपूर्ण प्रमाणका रुपमा लिइन्छ ।

पोखरामा विमान दुर्घटनापछि बसेको मन्त्रिपरिषद् बैठकले पूर्वसचिव नागेन्द्र घिमिरेको संयोजकत्वमा छानविन आयोग गठन गरेको थियो । जसमा हवाई विज्ञद्वय दीपकप्रकाश बास्तोला, सुनिल थापा, हवाई मर्मत इञ्जिनियर एकराजजङ्ग थापा सदस्य छन् ।

आयोगको सदस्य सचिवमा भने संस्कृति,पर्यटन तथा नागरिक उड्डयन मन्त्रालयका सहसचिव बुद्धिसागर लामिछाने रहेका छन् ।