काठमाडौँ । आईसीसी एक दिवसीय विश्वकपको पहिलो सेमिफाइनल खेलमा आयोजक भारतले न्युजिल्यान्डलाई जितका लागि तीन सय ९८ रनको लक्ष्य दिएको छ । विराट कोहलीको शतकको मदतमा भारतले तीन सय ९७ रन बनाएको हो ।

मुम्बइस्थित वानखेड स्टेडियममा कोहलीले कीर्तिमानी शतक बनाए । उनले टोलीका लागि एक सय १७ रनको बनाए । त्यसअघि विराटले आफ्नै राष्ट्रका महान् खेलाडी सचिन तेन्दुल्करको कीर्तिमान तोडेका थिए । योसँगै एक दिवसीय अन्तर्राष्ट्रिय क्रिकेटमा विराटको शतक सङ्ख्या ५० पुगेको छ ।

सचिनले एक दिवसीय अन्तर्राष्ट्रियमा ४९ र टेस्ट क्रिकेटमा ५१ वटा शतक बनाएका छन् । बुधवार खेलिएको न्युजिल्यान्डविरुद्धको सेमिफाइनल खेलमा विराटका अतिरिक्त चौथो नम्बरका ब्याट्सम्यान श्रेयस ऐयरले पनि सतकीय पाली खेले । उनले टोलीका लागि एक सय पाँच रनको योगदान गरे । यसका क्रममा उनले केवल ७० बलको सामना गरी आठ छक्का र चार चौका हिर्काए ।

ओपनर शुभमन गिलले पनि टोलीका लागि अविजित ८० रन, कप्तान रोहित शर्माले ४७, विकेटकिपर ब्याट्सम्यान केएल राहुलले ३९ रनको योगदान गरे ।