भादगाउँ– भक्तपुरको पवित्र तीर्थस्थल हनुमानघाटमा आज स्रोहश्राद्ध गर्नेको घुइँचो लागेको छ । आश्विन कृष्णपक्ष सुरु भएसँगै १६ दिनसम्म गरिने श्राद्धको अन्तिम पितृपक्षका दिन दिवङ्गत हुनुभएका आफन्तहरूको नाममा पिण्डदान गर्नेको घुइँचो छ ।

हनुमानघाट क्षेत्रमा मृतकका नाममा पिण्डदान गरे दिवङ्गतको आत्माले मोक्ष प्राप्ति गर्ने धार्मिक विश्वासले भक्तपुरका नगरवासी हनुमानघाट क्षेत्रमा आई स्रोह्रश्राद्ध गर्न आउने पुरोहित गोविन्दराज राजोपाध्ययले जानकारी दिए । 

उनले, ‘पितृपक्षमा गरिने स्रोह्रश्राद्ध  हनुमानघाट क्षेत्रमा गरी हनुमन्ते नदीमा पिण्डदान गरी सेलाए आफ्नो पूर्वज दिवङ्गतले मात्र नभएर दूरदराजका आफन्त र छरछिमेकका दिवङ्गत आत्मालाई समेत मोक्ष प्राप्त हुन्छ ।’   

पुरोहित राजोपाध्ययका अनुसार नेवार समुदायमा सोह्रश्राद्ध गर्नुको छुट्टै महत्व रहेको छ । यो श्राद्ध नगरे कुलदेवताको पूजा गरी भोजन गर्नु हुँदैन भन्ने धार्मिक मान्यता अहिले पनि छ । वर्ष दिनमा गरिने कुनै पनि शुभकार्यको थालनीका लागि पनि यो श्राद्ध गरिन्छ ।

त्रिवेणी घाटका रुपमा हनुमानघाटलाई लिने गरिन्छ । आजको दिन त्यहाँ स्नान गरी स्रोह्रश्राद्ध गर्नाले पाप नष्ट हुनुका साथै दिवङ्गतले सजिलै वैकुण्ठ बास पाउँछन् भन्ने धार्मिक विश्वास रहेको छ ।