रोम- युरोपेली मुलुक इटालीले चीनको महत्वकांक्षी परियोजना बेल्ट एण्ड रोड इनिसिएटिभ अर्थात् बीआरआई सम्झौताबाट अलग हुने तयारी गरेको छ ।

अमेरिकी अखबार ब्लुम्बर्गलाई उद्धृत गर्दै इन्डिया ब्लुमले जनाएअनुसार अर्बौँ डलरको परियोजनाबाट कुनै लाभ नभएको निष्कर्ष निकाल्दै इटालीले यस सम्झौताबाट अलग हुने तयारी गरेको हो ।

यसअघि इटालियन रक्षामन्त्री गुइदो क्रोसेट्टोले पनि आफ्नो मुलुकले बीआरआईबाट पछि हट्ने तयारी गरेको बताइसकेका छन् । करिब डेढ महिनाअघि कोरिएरे डेला सेरा अखबारलाई दिएको अन्तरवार्तामा उनले ‘सम्बन्धमा असर नपर्नेगरी उक्त सम्झौताबाट कसरी पछि हट्ने भन्ने मुख्य मुद्दा रहेको’ उल्लेख गरेका थिए । अन्तरवार्तामा उनले चीन साझेदारमात्र नभएर प्रतिस्पर्धी पनि भएको बताएका थिए ।

इटालीले सन् २०१९ मा बीआरआई सम्झौतामा हस्ताक्षार गरेको थियो । यससँगै इटाली बीआरआई सम्झौतामा हस्ताक्षर गर्ने जी ७ को पहिलो सदस्य मुलुक बनेको थियो ।