काठमाडौँ- प्रतिनिधिसभा सदस्य एवम् नेकपा एमालेका पोलिटब्यूरो सदस्य सूर्य थापाले टिकटक बन्द गर्ने मन्त्रिपरिषदको निर्णय खेदजनक रहेको बताएका छन् ।

आज बसेको मन्त्रिपरिषद बैठकले टिकटक बन्द गर्ने निर्णय गरेपछि सांसद थापाले विज्ञप्ति जारी गर्दै आपत्ति जनाएका हुन् । थापाले विज्ञप्तिमा सरकारको यो निर्णयले ’जान्नेलाई श्रीखण्ड नजान्नेलाई खुर्पाको बिंड’ भन्ने नेपाली भनाइ व्यवहारमा चरितार्थ गर्न खोजेको प्रष्ट भएको जनाएका छन् ।

‘संसारभरी टिकटकले हासिल गरेको लोकप्रियताले नेपाली समाजलाई पनि अत्यन्त छोटो समयमै प्रभावित गरेको छ । नेपाली जनजीवनका बहुआयामिक क्षेत्रमा गहिरो गरी जोडिएर यो वैकल्पिक मिडियाका रूपमा स्थापित छ ।’ उनले विज्ञप्तिमा उल्लेख गरेका छन् । टिकटकलगायत वैकल्पिक सञ्चारका साधनहरूलाई व्यवस्थित गर्नु अत्यावश्यक भएपनि मन्त्रिपरिषदले स्वेच्छाचारी रूपमा बन्द गर्ने निर्णय गरेर होइन, संसदबाट कानून बनाएरमात्रै यसो गरिनुपर्ने उनको भनाइ छ ।

उनले टिकटक, फेसबुकलगायतका सामाजिक सञ्जालहरूलाई कानुनबमोजिम नियमन गर्न, दर्ता भएर मात्रै सञ्चालन गर्ने व्यवस्था मिलाउन र करको दायरामा ल्याउन मागसमेत गरेका छन् ।

सांसद थापाले विज्ञप्तिमा भनेका छन् ‘म प्रचण्डपथको प्रेत बोकेर बन्द समाजतर्फ उन्मुख हुँदै धुन्धुकारी बाटोमा अघि बढेको सरकारलाई होसमा फर्केर जनविरोधी निर्णय अविलम्ब फिर्ता लिन ध्यानाकर्षण गराउन चाहन्छु ।