विराटनगर- कोशी प्रदेशमा नयाँ मुख्यमन्त्रीमा दाबी गर्न प्रदेश प्रमुख परशुराम खापुङले दिएको समय सकिएको छ । खापुङले नयाँ मुख्यमन्त्रीमा दाबी गर्न शुक्रबार ५ बजेसम्मको समय दिएका थिए ।

हालसम्म मुख्यमन्त्रीमा सत्ता गठबन्धनबाट नेकपा माओवादी केन्द्रका प्रदेश संसदीय दलका नेता इन्द्र आङ्बो र नेकपा एमालेसँग मिलेर नेपाली कांग्रेसको शेखर कोइराला समूहबाट केदार कार्कीले दाबी पेश गरेका छन् ।

नेपाली कांग्रेसको शेखर कोइराला पक्षले नेकपा एमालेसँग मिलेर मुख्यमन्त्रीमा दाबी गरेसँगै कोशी प्रदेशमा राजनीतिक तरंग उत्पन्न भएको छ । यससँगै अब नयाँ मुख्यमन्त्री नियुक्तिको प्रक्रिया अघि बढ्नेछ । यद्यपि कसलाई मुख्यमन्त्री नियुक्त गर्नेबारे अन्यौलता कायमै रहेको छ ।