काठमाडौँ- भुटानले सन् २०२५ सम्म औलो रोग निवारण गर्ने लक्ष्य अघि सारेको छ ।

भुटानबाट प्रकाशित हुने द भुटान लाइभ अनलाइनका अनुसार गत वर्ष उक्त मुलुकमा ९ जना औलोका बिरामी देखा परेका थिए ।

यसअघि भुटानले सन् २०१८ र २०२० मा औलो निवारण गर्ने लक्ष्य लिएको थियो । यद्यपि मुलुकको दक्षिणी सीमामा देखिएको समस्या र कोरोना भाइरसको महामारीका कारण उक्त लक्ष्य पूरा हुन नसकेको स्वास्थ्य अधिकारीले जनाएका छन् ।

भुटानको स्वास्थ्य मन्त्रालयले औलो निवारणको अर्थ उक्त रोगलाई पूर्ण रुपमा निर्मूल पार्नु भने नरहेको स्पष्ट पारेको छ । सामुदायिक स्तरमा औलो निवारण भएपनि आयातित रुपमा यस रोग फैलिनसक्ने मन्त्रालयको भनाइ छ ।

औलो रोगबारे अनुसन्धान, कन्ट्याक्ट ट्रेसिङ, सर्वेक्षणलगायतका कार्यलाई तीव्र पारिने स्वास्थ्य अधिकारीहरुले जानकारी दिएका छन् ।

यसका लागि जनचेतनामूलक कार्यक्रम र रोकथामका उपायजस्ता कदम पनि चालिने भुटान लाइभले उल्लेख गरेको छ । औलो रोग निवारण गर्न हरेक व्यक्तिले आफ्नो दायित्व समेत पूरा गर्नुपर्ने भुटानकी स्वास्थ्यमन्त्री ल्योन्पो डाशो डेचेन वाङ्मोले बताएकी छिन् ।