काठमाडौँ : जनस्वास्थ्यविद् डा.अरुणा उप्रेतिले नेताहरुको कारण नेपालको स्वास्थ्य प्रणाली सुध्रिन नसकेको टिप्पणी गरेकी छन् । खबरहबले आयोजना गरेको ‘चिकित्सा शिक्षाको चुनौति र नेपालको स्वास्थ्य प्रणाली’ विषयक कार्यक्रममा बोल्दै जनस्वास्थ्यविद् डा.उप्रेतिले नेताहरु आफ्नो उपचार गर्न विदेश जाने र सर्वसाधारणको उपचारमा सँधै खेलाँची गर्ने प्रवृत्ति बढेको उनले बताइन् ।

नेपालका कुनै पनि नेताहरुले जनस्वास्थ्यको विषयमा गम्भीर अ्रध्ययन गर्न बोल्नै नसकेको उनको भनाई छ । कांग्रेस नेता गगन थापाले जनस्वास्थ्यको विषयमा केही बोल्ने गरेपनि त्यो आवाज अहिले बन्द भएको डा.उप्रेतिले बताइन् ।

विदेशमा नेताहरु बिरामी पर्दा स्वदेशमै उपचार गर्ने तर नेपालका नेताहरु सानो बिरामी पर्दा पनि बिदेश जाने समस्याले गर्दा देशकै स्वास्थ्य प्रणाली सुध्रिन नसकेको उनको भनाई रह्यो ।

‘नेताहरु सानो बिरामी पर्दा बिदेश गइहाल्छन् । अनि जनता बिरामी पर्दा सुन्दै सुन्दैनन्’ उनले भनिन्, ‘नेताहरुले खेलाँची गर्दा नेपालको स्वास्थ्य प्रणाली सुध्रिन सकेन ।’

उनले यसबारे आफुले निरन्तर बोल्ने गरेको भन्दै अझै प्रश्न उठाइरहने बताइन् ।