विराटनगर- संघीय मामिला तथा सामान्य प्रशासनमन्त्री अमनलाल मोदीले आगामी निर्वाचनमा दुई तिहाइ नजिक आए संविधान संशोधन गरेर पहिचानसहितको संघीयता लागू गर्न कुनै अफ्ठेरो नरहेको बताएका छन् ।

नेपाल आदिवासी जनजाती पत्रकार महासंघ (फोनिज) को २४ औं स्थापना दिवसका अवसरमा शनिबार विराटनगरमा आयोजित कार्यक्रममा मन्त्री मोदीले माओवादीले पहिचानसहितको संघीयताको आवाज उठाएपनि निर्णायक हुन नसकेकाले लागू गर्न नसकिएको बताए । उनले तिहाइ नजिकको मत आए पहिचानसहितको संघीयता लागू गर्न कुनै अफ्ठेरो नरहेको पनि बताएका हुन् ।

पहिचानसहितको अधिकार माग गर्नेहरुले नै निर्वाचनका बेला अन्य पार्टीलाई मत दिदा समस्या भएको उनको भनाइ छ । मन्त्री मोदीले प्रदेशको नामाकरणको अधिकार सम्बसन्धत प्रदेशसभालाई हुने भएपनि एक नम्बर प्रदेशको नामाकरण पहिचानका आधारमा हुनुपर्ने आफ्नो धारणा रहेको जिकिर गरे ।

पहिचानसहितको संघीयता लागू गर्नका लागि माओवादीबाट भएका त्रुटीहरुको समीक्षा पनि भइरहेको उनको भनाइ छ । त्यस्तै, मन्त्री मोदीले वर्षौदेखि बन्न नसकेको संघीय निजामति ऐन आफू आएपपछि स्वीकृतिका लागि मन्त्रिपरिषदमा पुग्ने प्रक्रियामा रहेको जानकारी दिए ।

कार्यक्रममा फोनिज राष्ट्रिय पत्रकारिता सम्मान २०८० पत्रकार दिलीप थापा मगरलाई प्रदान गरिएको थियो । त्यस्तै, फोनिज मातृभाषा पत्रकारिता सम्मान–२०८० काठमाडौँबाट प्रकाशित हुँदै आएको ‘नेपालभाषा टाइम्स दैनिक’ लाई प्रदान गरिएको छ । त्यसैगरी, ‘फोनिज राष्ट्रिय पत्रकारिता पुरस्कार–२०८०’ स्व किसन राई (मरणोपरान्त), देव पचभैया पाल्पा, जीवन लामा दोलखा र उन्नति चौधरी कैलालीलाई प्रदान गरिएको छ ।