काठमाडौँ- सुदूरपश्चिम प्रदेशमा सभामुख चयनका लागि आज दिउँसो १ बजे मतदान हुँदैछ।

सभामुखका लागि सत्ता गठबन्धनबाट नेकपा माओवादी केन्द्रका भीम भण्डारी र नेपाली कांग्रेसबाट प्रदेशसभाका ज्येष्ठ सदस्य मानबहादुर रावलले उम्मेदवारी दर्ता गराएका छन्।

भण्डारीको प्रस्तावकमा एमालेकी प्रदेशसभा सदस्य जानकी बम ऐर र समर्थकमा माओवादीकी गीता माल छिन् भने रावलको प्रस्तावकमा प्रदेशसभा सदस्य मेघराज खड्का र समर्थकमा पृथ्वीबहादुर सिंह छन्। रावल अछाम र भण्डारी बझाङबाट निर्वाचित प्रदेशसभा सदस्य हुन्।

५३ सदस्यीय प्रदेश सभामा सभामुख बन्न कम्तीमा २७ मत आवश्यक पर्छ। प्रदेश सभामा सबैभन्दा ठूलो दल कांग्रेसका १९ सांसद हुँदा दोस्रो ठूलो दल माओवादी केन्द्रका ११ र एमालेका १० जना सांसद छन्।

सत्ता गठबन्धनबीच सुदूरपश्चिमको सभामुख माओवादीले पाउने सहमति भएको छ।