काठमाडौँ– इटालियन सिरी ए फुटबलमा रोमा र फिओरेन्टिनाले बराबरी खेलेका छन् । गएराति भएको खेलमा दुवै टोलीले १–१ गोल गर्दै अंक बाँडेका छन् ।
रोमाका लागि रोमेलु लुकाकु र फिओरेन्टिनाका लागि लुकास मार्टिनेजले एक–एक गोल गरेका थिए । लुकाकुले खेल सुरु भएको पाँचौँ मिनेटमा गोल गरेका थिए भने मार्टिनेजले सातौँ मिनेटमा गोल फर्काएका थिए ।
खेलमा रोमाका दुई खेलाडी लुकाकु (८७औँ मिनेट) र निकोला जेलेस्की (६४औँ मिनेट)ले रातो कार्ड पाएपछि रोमा ९ खेलाडीमा सीमित भएको थियो ।
यो बराबरीसँगै १५ खेलबाट २५ अंक जोडेको रोमा चौथो स्थानमा छ भने फिओरेन्टिना २४ अंकसहित सातौँ स्थानमा छ । ३८ अंक जोडेको इन्टर मिलान तालिकाको शीर्षस्थानमा छ ।
प्रतिक्रिया