काठमाडौँ- राष्ट्रियसभा सदस्य भगवती न्यौपानेले देशमा पीडितहरुले समयमा नै न्याय नपाउने अवस्था बनेको बताएकी छिन् ।

मंगलबार राष्ट्रियसभा बैठकमा विनियोजित बजेटका विभिन्न शीर्षकमाथिको छलफलका क्रममा न्यौपानेले बर्षौदेखि अदालतमा रहेका मुद्दाहरुको किनारा नलागेको र पीडितहरुले समयमा नै न्याय नपाउने अवस्था बनेको बताएकी हुन् ।

उनले पहुँच हुनेले मात्र न्याय पाउने अवस्था रहेको भन्दै यसलाई अन्त्य गर्न सरकार र कानून मन्त्रालय उदासीन रहेको उल्लेख गरिन् । सर्वोच्च अदालतमा न्यायाधीश नियुक्त गर्ने विषयमा कानून मन्त्रालयले ढिलासुस्ती गरिरहेको उनको आरोप छ ।

न्यौपानले मुलुकमा धेरै परिवर्तन भएपनि कतिपय कानून पञ्चायतकालदेखिकै रहेकाले समयानुकूल नयाँ कानूनहरु ल्याउनुपर्ने बताइन् । कानून, न्याय तथा संसदीय मामिला मन्त्रालय कानून बनाउने कुरामा समेत उदासीन देखिएकाले खर्च कटौतीको प्रस्ताव राखेको उनले बताइन् ।