काठमाडौँ- नेपाल राष्ट्र बैंकका गभर्नर महाप्रसाद अधिकारीले अहिलको अवस्थामा बैंक तथा वित्तीय क्षेत्र सुरक्षित रहेको जनाएका छन् ।

मंगलबार काठमाडौंमा पत्रकार सम्मेलन गर्दै गभर्नर अधिकारीले बैंक तथा वित्तीय क्षेत्र पूर्णरुपमा सुरक्षित रहेको बताएका हुन् । पत्रकार सम्मेलनमा उनले नेपालका बैंकहरुको पुँजी पर्याप्तता अनुपात १३ प्रतिशत माथि रहेको, खुद तरलता अनुपात २.३ प्रतिशत माथि रहेको, खराब ऋण अनुपात २.६३ प्रतिशत मात्र रहेको जानकारी दिए ।

उनले गत वर्षसम्म नेपालको वाह्य क्षेत्र चापमा रहेपनि अहिले सुधार भइसकेको उल्लेख गरे । पत्रकार सम्मेलनमा गभर्नर अधिकारीले बजारमा तरलता सुधार हुँदै गएको भन्दै बजारले नै ब्याजदर निर्धारण गर्ने बताए ।

बैंकहरुको स्प्रेड दर घटाएर आमसर्वसाधारणलाई फाइदा पुर्‍याउने राष्ट्र बैंकको उद्देश्य रहेको भन्दै उनले साना ऋणीहरुका लागि आधार दरमा २ प्रतिशतसम्म मात्र प्रिमियम लिन पाउने व्यवस्था रहेको जिकिर गरे ।