काठमाडौँ- चीनले भारतसँग सीमा जोडिएको क्षेत्रमा रेलमार्ग निर्माण गर्ने महत्वकाङ्क्षी योजना अघि सारेको छ । चीनले भारतसँग सार्वभौमिकताको विवादमा रहेको अक्साई चीन क्षेत्रमा रेलमार्ग निर्माण गर्ने योजना अघि सारेको हो ।

तिब्बतसँग सीमा जोडिएको अक्साई चीन क्षेत्रमा चीनको कब्जा रहेपनि भारतले उक्त क्षेत्रमा आफ्नो सार्वभौमिकता दाबी गर्दै आएको छ ।

चीनको तिब्बत स्वशासित सरकारले जारी गरेको योजना अनुसार सो क्षेत्रमा हाल कायम १४ सय किलोमिटरको रेलमार्गलाई सन् २०२५ सम्म ४ हजार किलोमिटर विस्तार गरिनेछ ।

नयाँ योजनाअनुसार उक्त रेलमार्ग तिब्बतको सिगात्सेबाट सुरु भई अक्साई चीन हुँदै सिन्जियाङ प्रान्तको होटानसम्म पुग्नेछ । उक्त रेलमार्गको पहिलो चरण सन् २०२५ सम्म सम्पन्न भइसक्ने र बाँकी सन् २०३५ सम्म सम्पन्न गरिसक्ने चिनियाँ लक्ष्य छ ।

भारतीय र चिनियाँ सुरक्षाकर्मीबीच बेला बेला सीमा क्षेत्रमा झडपका घटना सार्वजनिक भइरहेको सन्दर्भमा चीनले सीमा क्षेत्रमा रेलमार्ग निर्माण गर्ने योजनालाई निकै चासोपूर्वक हेरिएको छ ।