काठमाडौँ- काठमाडौं र कालिकोटबाट लागूऔषधसहित ६ जना पक्राउ परेका छन् ।

काठमाडौको बूढानीलकण्ठ नगरपालिका ३ बूढानीलकण्ठ मन्दिर नजिकैबाट अवैध लागूऔषध ब्राउन सुगरजस्तो देखिने पदार्थ ८ ग्रामसहित सोही नगरपालिका ५ विष्णुमती बस्ने सुनसरी धरान उपमहानगरपालिका १२ घर भएका २० वर्षीय सन्दिप भन्ने समिर राईलाई प्रहरीले पक्राउ गरेको छ ।

प्रहरी प्रभाग बूढानीलकण्ठबाट खटिएको प्रहरीले उनलाई उक्त पदार्थसहित पक्राउ गरेको हो । साथै अनुसन्धानको क्रममा लागूऔषध ओसारपसारमा संलग्न रहेको खुल्न आएका अन्य २ जनालाई समेत काठमाडौं चाबहिलबाट प्रहरीले नियन्त्रणमा लिएको छ ।

त्यसैगरी, कालिकोटको खाँडाचक्र नगरपालिका २ जितेगडाबाट मान्मतर्फ जाँदै गरेको भे १ च ४३९१ नम्बरको बलेरो गाडीमा सवार भारत घर भएका २५ वर्षीय अभिशेक कुमार कश्यापसहित ३ जनालाई अवैध लागूऔषध ब्राउन सुगरजस्तो देखिने पदार्थ ७ ग्राम १ सय ५० मिलिग्रामसहित प्रहरीले पक्राउ गरेको छ । अस्थायी प्रहरी पोष्ट हुल्मबाट खटिएको प्रहरीले गाडी जाँच गर्ने क्रममा उनीहरूलाई उक्त पदार्थसहित फेला पारी पक्राउ गरेको हो ।