काठमाडौँ : अर्थविद् डा.रवीन्द्र पाण्डेयले आम्दानी नभई खाली आर्थिक वृद्धिको मात्रै कुरा गर्ने प्रवृत्ति घातक रहेको टिप्पणी गरेका छन् । खबरहबले आयोजना गरेको कार्यक्रममा बोल्दै अर्थविद् डा.पाण्डेयले पहिले आम्दानी बढाएर मात्रै आर्थिक वृद्धिको कुरा गर्न आवश्यक भएको बताएका हुन् ।

पछिल्लो समय राजनीतिक दलका नेताहरु केवल आर्थिक वृद्धिको मात्रै कुरा गरेर आम्दानी बढाउने विषयमा पन्छिदै गएको पनि उनको भनाई छ । रेमिट्यान्सले गर्दा अर्थतन्त्र धानिएको अवस्था भएपनि स्वदेशमै रोजगारी बढाउने र विदेशिएका नेपालीलाई देशमै रोक्ने खास रणनीति आर्थिक र राजनीतिक क्षेत्रका व्यक्तिमा नभएको उनले बताए ।

यसअघि ठूला देशका मानिसहरु पनि वैदेशिक रोजगारीमा जाने गरेको तथ्य रहेको भन्दै उनले सीमित समयका लागि वैदेशिक रोजगारीले रेमिट्यान्स बढाएपनि देशमै रोजगारी सिर्जना गरेपछि मात्रै अर्थतन्त्र सुधार हुने बताए ।

आयात लगातार बढ्ने र निर्यात नहुने समस्याले गर्दा पनि अर्थतन्त्र समस्या जटिल बनेको डा.पाण्डेयको भनाई छ । पूर्ववक्ता डा.चन्द्रमणि अधिकारीले नेपाली अर्थतन्त्र ‘रेडजोन’मा रहेको विषयमा टिप्पणी गर्दै अर्थविद् पाण्डेयले नेपाली अर्थतन्त्र रेडजोनमा परिसकेको अवस्था नभई रेडजोनमा पर्न लागेको भन्दै घण्टी बजाउने बेला भइसकेको बताए ।

रोजगारी सिर्जना गरेर उत्पादन बढाउने र त्यसबाट आउने पैँसाले मात्रै आर्थिक वृद्धि हुन सक्ने भन्दै राजनीतिक भाषण छाडेर व्यावहारिक अर्थतन्त्रलाई मूल मुद्दा बनाउनुपर्ने आवश्यकता रहेको उनले बताए ।