काठमाडौँ– राष्ट्रिय प्रजातन्त्र पार्टी नेपालका अध्यक्ष कमल थापाले अहिलेको भ्रष्ट व्यवस्थाको अन्त्यबिना देशलाई जोगाउन गाह्रो हुने बताएका छन् ।

पार्टीको भक्तपुर जिल्ला समितिद्वारा आज आयोजित कार्यक्रममा बोल्दै अध्यक्ष थापाले अस्थिरता र अराजकताको अन्त्य व्यक्ति परिबर्तनबाट सम्भव नहुने हुँदा अब व्यवस्था परिवर्तन गर्नुको विकल्प नभएको दावी गरे ।

व्यवस्था परिवर्तन गर्न अब राप्रपा नेपालले आन्दोलनको मार्ग रोजेको चर्चा गर्दै थापाले केही पार्टीका मुट्ठीभरका नेताहरुले सेटिङ्गमा मुलुक चलाएर विधिको शासनको चिरहरण गरेको बताए ।

गणतन्त्र, धर्मनिरपेक्षता र संघीयता असफल सिद्ध भइसकेकोले अब सबै अटाउने कोही निषेध हुनु नपर्ने मौलिक प्रजातन्त्र देशलाई आवश्यक रहेको उनले बताए ।

राजादेखि विप्लव माओवादीसम्म अटाउने मौलिक प्रजातन्त्र, सर्वधर्म समभवपूर्ण धार्मिक स्वतन्त्रतासहितको सनातन हिन्दूराज्य र सुदृढ स्थानीय स्वायत्त शासन प्रणालीले देशको हित र रक्षा गर्ने थापाको कथन थियो ।

कार्यक्रममा पार्टीका उपाध्यक्ष तारानाथ लुइँटेल ,बागमती प्रदेश इन्चार्ज माधव खत्री जिल्ला अध्यक्ष श्यामप्रसाद नेपालले आन्दोलनको तयारी र जनपरिचालनबारे आआफ्नो धारणा राखेका थिए ।