काठमाडौँ – आइसिसी एकदिवसीय विश्वकप क्रिकेटमा इंग्ल्यान्डले दोस्रो जित निकालेको छ । बुधबार नेदरल्यान्ड्सलाई १६० रनले पराजित गर्दै इंग्ल्यान्डले दोस्रो जित निकालेको हो । यो जितसँगै च्याम्पियन्स ट्रफिका लागि छनोट हुने इंग्ल्यान्डको सम्भावना कायमै रहेको छ ।

पुनेमा ३ सय ४० रनको लक्ष्यसहित जवाफी ब्याटिङमा उत्रिएको नेदरल्यान्ड्स ३७.२ ओभर १ सय ७९ रन बनाएर अलआउट भयो । उसका लागि तेजा निदामनुरुले सर्वाधिक ४१ रन बनाए । यस्तै स्कट एडवार्ड्सले ३८ र वेल्सी बरेसीले ३७ रन बनाए ।

बलिङतर्फ इंग्ल्यान्डका मोइन अली र अदिल रसिदले ३–३ विकेट लिए।

त्यसअघि इंग्ल्यान्डले निर्धारित ५० ओभरमा ९ विकेट गुमाएर ३ सय ३९ रन बनाएको थियो । उसका लागि बेन स्टोक्सले ८४ बलमा १ सय ८ रन बनाए । ओपनर डाविड मालनले पनि ७४ बलमा ८६ रनको महत्त्वपूर्ण योगदान दिए । भने त्रिस बक्सले ४५ बलमा ६१ रन बनाए । नेदरल्यान्ड्सका बास डी लिडले ३ विकेट लिए।