काबुल- अफगानिस्तानमा सञ्चारकर्मीविरुद्ध हिंसामा वृद्धि भएको पाइएको छ । अफगानिस्तानको खामा प्रेसका अनुसार तालिबानको शासन रहेको अफगानिस्तानमा पछिल्लो समय सञ्चारकर्मीविरुद्धको हिंसामा वृद्धि देखिएको हो ।

अफगानिस्तानको पत्रकार केन्द्र (एफजेसी) ले सार्वजनिक गरेको एक शोधपत्रमा गत वर्षको तुलनामा यस वर्ष मुलुकमा सञ्चारकर्मीविरुद्धको हिंसामा ६४ प्रतिशतले वृद्धि भएको उल्लेख छ ।

यीमध्ये अधिकांश हिंसाका घटनामा मुलुकमा शासन चलाइरहेको तालिबान जिम्मेवार रहेको पनि उक्त शोधपत्रमा उल्लेख गरिएको छ ।

सन् २०२१ को अगस्ट महिनामा तालिबानले शासन थालेयता अफगानिस्तानमा सञ्चालित ६ सय सञ्चारगृहमध्ये आधा बन्द भएका छन् ।

यसबाहेक तालिबानका कारण स्वतन्त्र सञ्चार माध्यमहरु आर्थिक रुपमा धराशायी भएको पनि शोधपत्रमा जनाइएको छ ।