लमजुङ- लमजुङमा पछिल्लो १० वर्षमा चितुवाको आक्रमणबाट दुई सयभन्दा धेरै घरपालुवा जनवारको क्षति भएको पाइएको छ । डिभिजन वन कार्यालय लमजुङको तथ्याङ्क अनुसार आर्थिक वर्ष २०७०/७१ देखि आर्थिक वर्ष ०७९/८० सम्म चितुवाको आक्रमणबाट दुई सय तीन पशु चौपायमा क्षति पुगेको हो ।

जिल्लाका विभिन्न स्थानमा चितुवाको आक्रमणबाट गत आर्थिक वर्षमा मात्रै ६८ भेडाबाख्रामा क्षति पुगेको छ । पछिल्लो १० वर्षमा चितुवाको आक्रमणबाट एकसय ९५ भेडा बाख्रा, दुईवटा गाईगोरु, र ६ वटा भैसीमा क्षति पुगेको डिभिजन कार्यालयले जनाएको छ ।

जिल्लाका विभिन्न स्थानीय तहमा चितुवाको आक्रमणबाट सवैभन्दा धेरै आर्थिक वर्ष २०७८/७९ मा ७२ वटा घरपालुवा जनवारमा क्षति पुगेको छ । सो आर्थिक वर्षमा मात्रै ६८ वटा भेडा बाख्रा, चार वटा भैँसीमा चितुवाले क्षति पुर्‍याएको कार्यालयको तथ्याङ्कले देखाउँछ ।

सोबाहेक आर्थिक वर्ष २०७७/७८ मा २८ भेडा बाख्रा सहित ३० वटा घरपालुवा जनवार, ०७६/७७ मा १३, आर्थिक वर्ष २०७५/७६ मा १०, आर्थिक वर्ष ०७३/७४ मा सात वटा घरपालुवा जनवारमा चितुवाले आक्रमण गरेर क्षति पुर्‍याएको छ । त्यसैगरी, आर्थिक वर्ष ०७०/७१, आर्थिक वर्ष ०७२/७३ र आर्थिक वर्ष ०७४/७५ मा चितुवाको आक्रमणबाट एउटा घरपालुवा जनवारमा क्षति पुगेको छ ।

पछिल्लो समय वन्यजन्तुको व्यवस्थापन, मानव–वन्यजन्तु द्वन्द्व न्यूनीकरण, बासस्थान सुधारलगायत अन्य विविध विषय चुनौती बनेको डिभिजन वन कार्यालयका डिभिजन प्रमुख पूर्णेश्वर सुवेदीले बताए । जिल्लामा बर्सेनी घरपालुवा जनवारमा वन्यजन्तुको आक्रमण बढेपनि मानवीय क्षति भने अहिलेसम्म भएको छैन ।

सरकारले वन्यजन्तुबाट हुने क्षतिको निम्ति राहत प्रदान गर्न आधारहरु सहित निर्देशिका तयार गरेको छ । निर्देशिकामा मानवीय क्षति, पशुधनको क्षति, भण्डारण गरेको अन्नको क्षति, घर/गोठको क्षति, खाद्यान्न बालीको क्षति र हिमाली क्षेत्र सम्वन्धी विशेष व्यवस्था जस्ता आधार रहेका छन् ।