काठमाडौँ- पूर्वअर्थमन्त्री सुरेन्द्र पाण्डेले अर्थमन्त्री डा. प्रकाशशरण महतलाई आर्थिक वर्ष २०८०/८१ को बजेटबारे ४ बुँदे सुझाव दिएका छन् । अर्थमन्त्री महतले आयोजना गरेको पूर्वअर्थमन्त्रीहरुसँगको छलफलका क्रममा पूर्वअर्थमन्त्री पाण्डेले ४ बुँदे सुझाव प्रस्तुत गरेका हुन् । पाण्डेसहित अर्थमन्त्री महतले पूर्वअर्थमन्त्रीहरु डा. प्रकाशचन्द्र लोहनी, ज्ञानेन्द्रबहादुर कार्की, विष्णुप्रसाद पौडेल र डा. युवराज खतिवडासँग आगामी आर्थिक वर्षको बजेटबारे सुझाव लिएका हुन् ।

छलफलमा पूर्वअर्थमन्त्रीहरूले व्यावहारिक बजेट तयार गर्न, खर्च कटौतीमा निर्मम बन्न र अनावश्यक दायित्व थपिने गरी नयाँ आयोजना थप नगर्न सुझाव दिएका थिए ।

खबरहबसँग कुराकानी गर्दै पूर्वअर्थमन्त्री पाण्डेले युवाहरूलाई रोजगारीमा ल्याउन र अहिलेको उद्यमशीलतालाई विकास गर्नका लागि राष्ट्र बैंकले मौद्रिक नीति ल्याउने र यसका लागि सरकारले निर्देशन दिनेबारे सुझाव दिएको बताए ।

बजेटमार्फत् सरकारले युवाहरूलाई रोजगारीमा ल्याउन र अहिलेको उद्यमशीलतालाई विकास गर्नको लागि बिना धितो ऋण पाउने व्यवस्था गर्नेबारे छलफल गरेको पाण्डेको भनाइ छ । उनले युवाहरुले २० प्रतिशत लगानी गरे त्यसमा सरकरले ८० प्रतिशतसम्म ऋण दिने व्यवस्था गर्नेबारे पनि सुझाव दिएको बताए ।

उनले सक्षम उद्यमीलाई ३० प्रतिशत इक्युटीमा लगानी भए ७० प्रतिशतसम्म ऋण दिने व्यवस्थाबारे पनि आफूले जोड दिएको उल्लेख गरे ।

धनीहरूलाई कम्तीमा ५० प्रतिशत इक्युटी र ५० प्रतिशत ऋण दिनेबारे पनि चर्चा गरेको उनको भनाइ छ । यसका लागि सरकारले आर्थिक नीतिमा परिवर्तन ल्याउनु पर्ने उनको भनाइ छ ।