लमजुङ– लमजुङको सुन्दरबजार नगरपालिकामा चालु आर्थिक वर्ष भित्र कार्यान्वयन हुने गरी सम्झौता भएका योजना मध्ये करिब ३३ प्रतिशत योजना मात्र सम्पन्न भएका छन् । चालु आर्थिक वर्ष २०७९-०८० मा उपभोक्ता समितिमार्फत सञ्चालन हुने गरी वडा वडामा छनौट भएका योजना मध्ये ३३ प्रतिशतले भुक्तानी लिइसकेको योजना शाखाका प्रमुख ऋषिराम पौडेलले बताए । नगरपालिकामा वडागत योजना मध्ये १ सय ५० योजना सम्झौता भएकोमा हालसम्म ३२ दशमलब ९० प्रतिशत अर्थात् ४९ योजना मात्र सम्पन्न भई भुक्तानी लिइसकेका छन् ।

 नगरपालिकाका ११ वडामा चालु वर्षभित्र सम्पन्न हुनेगरि सम्झौता भएका योजनामा सबैभन्दा धेरै वडा नंं। १ र ६ मा २२-२२ वटा योजना रहेका छन् । ती मध्ये १ मा १० वटा र वडा नंं ६ मा ६ वटा योजना सम्पन्न भई भुक्तानी समेत गरिएको नगरपालिका योजना शाखाले जनाएको छ । त्यस्तै वडा नं। ९ मा १९ योजना सम्झौता भएकोमा ११ वटा फछर्यौट भइसकेको छ । वडा नं ७ र १० मा हालसम्म कुनै पनि योजना सम्पन्न नभएको योजना योजना शाखाले जनाएको छ ।

सोबाहेक वडा नंं २ मा चार, ३ मा चार, ४ मा तीन, ५ मा छ, ८ मा चार र वडा नंं ११ मा छ वटा योजना सम्पन्न भई भुक्तानी समेत लिइसकेको बताइएको छ । त्यस्तै वडा नंं ७ र ९ को साझा एक योजना पनि फर्छ्यौट भएको छ । योजना शाखाका अनुसार हालसम्म सम्झौता भएका योजनामध्ये ९ वटा योजना भुक्तानी प्रक्रियामा रहेको र ८८ योजना कार्यान्वयनको चरणमा रहेका छन् ।

नगरपालिकाले योजना सम्झौताको अन्तिम मिति यही चैत २५ गते सम्मलाई तोकेको छ । यसअघि सम्झौता भएका तथा अव सम्झौता हुने योजनाहरू आगामी जेठ मसान्तसम्म कार्यान्वयन गरिसक्नुपर्ने समयसीमा तोकिएको छ ।

आर्थिक वर्षको अन्त्यसम्म पुग्दा आयोजनाहरू राम्रो नहुने भन्दै आधिकांश स्थानीय तहले चैत मसान्तभित्रमा सबै योजना सम्पन्न गर्ने समयसीमा तोकेका छन् । तर चैत सकिनै लाग्दा पालिकाहरूमा ५० प्रतिशत पनि योजना सम्पन्न नहुदाँ विगतका वर्षहरूमा जस्तै यस वर्ष पनि असार मसान्तमा हतार हतार काम गरी भुक्तानीका लागि चटारो हुने देखिएको बताइन्छ ।

 असार १५ गते भित्रमा सम्झौता भएका सबै योजना सम्पन्न गरी भुक्तानी लिइसक्नुपर्ने प्रावधान रहेकोले कार्यान्वयनको चरणमा रहेको योजनाहरूको काम समयमै सम्पन्न गर्न नगरपालिकाले ताकेता गर्दै आएको योजना शाखाले जनाएको छ ।