काठमाडौँ– नेकपा एमालेका महासचिव शंकर पोखरेलले प्रधानमन्त्री पुष्पकमल दाहाल प्रचण्डको अभिव्यक्तिले जननिर्वाचित प्रतिनिधिसभाको सर्वोच्चतालाई अपमानित र अवमूल्यन गरेको बताएका छन् ।

आज सामाजिक सञ्जाल फेसबुकमार्फत महासचिव पोखरेलले आफूलाई प्रधानमन्त्री बनाउन सरदार प्रितम सिंह पटकपटक दिल्ली गएको भन्ने प्रधानमन्त्री प्रचण्डको अभिव्यक्तिले संसदकै अपमान गरेको उल्लेख गरेका छन् ।

उनले जननिर्वाचित प्रतिनिधिसभाको सर्वोच्चतालाई अपमानित गर्ने र अवमूल्यन गर्ने प्रधानमन्त्री प्रचण्डको अभिव्यक्ति अक्षम्य रहेको बताए। यसप्रति सांसदहरूको गम्भीर ध्यान जाने उनको भनाइ छ ।

महासचिव पोखरेलले प्रचण्डको धुर्त्याइँले नेपाली राजनीति विवादास्पद र अस्थिर बनेको कुरामा कुनै सन्देह नरहेको भन्दै सत्ता र शक्तिका लागि जे पनि गर्न सक्ने कुरालाई पटक पटकका घटनाक्रमहरू साक्षी रहेको बताएका छन् ।