सप्तरी – सप्तरीको कञ्चनरुप नगरपालिका–१ बैरवा पोटरी हटियास्थित मुस्लिम टोलमा आज आगलागी हुँदा सात परिवारको रु ४४ लाख ५० हजार बराबरको धनमाल क्षति भएको छ ।

स्थानीय कलिम शेखको फुसको घरमा अचानक आगलागी हुँदा सँगै टाँसिएको गाईगोठ जली पूर्णरूपमा नष्ट भएको र उक्त आगो फैलिई निजका भाइ मर्तुन्ज शेखको नजिकै रहेको एक कोठे फुसको घर र निजका सानो भाइ इस्लाम शेखको दुई तले टिनको जस्तापाता भएको कच्ची घरमा आगो लाग्दा हुँदा घरमा रहेको सरसमान जली क्षति भएको जिल्ला प्रहरी कार्यालय सप्तरीले जनाएको छ ।

आगलागीबाट कञ्चनरुप–१ बैरवा बस्ने तीन दाजुभाइको रु ४४ लाखभन्दा बढीका सामग्री जलेर नष्ट भएको प्रहरीले जनाएको छ । स्थानीयवासी, सशस्त्र प्रहरी, नेपाल प्रहरी, हनुमान नगर कंकालिनी नगरपालिका र कञ्चनरुप नगरपालिका दमकलको सहयोगमा आगो नियन्त्रणमा लिइएको थियो ।

आगलागी पीडित परिवारलाई राहत

यसैबीच दलित सरोकार मञ्च नेपालले बैरवा पोटरी हटियास्थित मुस्लिम टोलमा भएको आगलागी पीडित परिवारलाई आज राहतमा खाद्यान्न र ब्लयाङ्केट वितरण गरेको छ ।

मञ्चका कार्यकारी निर्देशक भोलाकुमार पासवान, कञ्चनरुप– १ का वडाध्यक्ष रब्बान खान, कार्यपालिका सदस्यद्वय शोभा पासवान र सुरेश पंजियार, वडा सदस्य दुर्गानन्द यादव, कलिम शेख र संयुक्त दलित सङ्घर्ष समिति कञ्चनरुपका संयोजक रामदेश शर्मा खत्वेको उपस्थितिमा प्रतिपरिवार २५ किलो चामल, २० किलो गहुँको आटा, एक केजी दाल, एक केजी चिनी, एक लिटर तेल र चार वटा साबुन र एक÷एक थान ब्लयाङ्केट वितरण गरिएको हो ।

आगलागी पीडितको अवस्था बुझ्न प्रतिनिधिसभाका सांसद नवलकिशोर साह आगलागी भएको स्थलमा पुगेका थिए ।