काठमाडौँ– प्रतिनिधिसभाका सभामुख देवराज घिमिरेले निर्माणाधीन नयाँ संसद् भवनको निर्माणको गति बढाउन निर्देशन दिएका छन् ।

बिहीबार सिंहदरबारमा निर्माणाधीन नयाँ संसद् भवनको स्थलगत निरीक्षण गर्दै सभामुख घिमिरेले निर्माणको गति निकै सुस्त भएको र यसले थप भार पर्न जाने भन्दै निर्माणको गति बढाउन निर्देशन दिएका हुन् । निरीक्षणका क्रममा निर्माण पक्षले नयाँ संसद् भवनको ६३ प्रतिशत काम सकिएको जानकारी गराएको थियो ।

सभामुख घिमिरेले लक्ष्य अनुसार निर्माणको काम हुन नसकेको भन्दै निर्माणको गति वृद्धि गर्न, त्रुटिरहित काम गर्न निर्देशन दिए । उनले संसद् भवन निर्माणका क्रममा केही समस्या देखिए संसद् सचिवालय र आफूले समन्वयकारी भूमिका निर्वाह गर्ने प्रतिवद्धता जनाए । उनले आफूले संसद् भवन निर्माणको कामलाई कार्ययोजनाकै रुपमा फलोअप गर्ने बताए ।

सिंहदरबारस्थित पुतलीबगैंचा वरपरको १५१ रोपनी जग्गामा ८ वटा मुख्य भवनसहित १२ वटा अत्याधुनिक संसद् भवन निर्माण भइरहेको छ ।