काठमाडौँ- पाकिस्तानी सुरक्षा अधिकारीले पञ्जाब प्रान्तको प्रहरी चौकीमा हमला गर्न आएका आतङ्ककारीको प्रयासलाई असफल तुल्याइदिएको बताएका छन् ।

पेशावरमा हमला गरेर कैयौँ मानिसको ज्यान लिएको केही दिनपछि पाकिस्तानको पूर्वी प्रान्त पञ्जावमा रहेको एक प्रहरी चौकीमा मङ्गलबार मध्यराततिर ठूलो सङ्ख्यामा आतङ्ककारीहरु शक्तिशाली हतियार लिएर त्यहाँ पुगेका थिए ।

मध्यरातमा शक्तिशाली हतियार ल्याएर ठूलो सङ्ख्यामा आएका उनीहरुको प्रयासलाई असफल तुल्याएको पन्जाब प्रान्तको प्रहरीले जनाएको छ ।

पन्जाब प्रहरीका प्रवक्ता अनबर असमानले सो प्रहरी चौकीमा ठूलो सङ्ख्यामा प्रहरी रहेका र रातिको समयमा सो चौकीमा क्षति पुर्‍याउने गरी आएका आतङ्ककारीको प्रयासलाई असफल तुल्याएर ठूलो मानवीय क्षति हुनबाट जोगाएको बताए ।

सो प्रहरी चौकीमा यसअघि पनि आक्रमणको प्रयास भएको र प्रहरीले उक्त प्रयास पनि यसैगरी असफल तुल्याएको जनाइएको छ । त्यसैले यस पटक आतङ्ककारीहरु ठूलो संख्यामा आएका बताइएको छ ।

रातिको समयमा प्रहरी चौकीमा आक्रमण सुरु गरेका आतङ्ककारीहरुलाई प्रहरीले प्रतिकार गर्दा कैयौँ आतङ्ककारी घाइते भएका पनि प्रवक्ता अनबरले जानकारी दिए ।