लमजुङ– लमजुङका गुरुङ समुदायले तमु नयाँ वर्षको रुपमा तामझाँमका साथ विविध कार्यक्रम गरि ल्होसार पर्व मनाएका छन् । वर्गचक्र फेरिएसँगै गुरुङ समुदायले नयाँ वर्षको रुपमा तमु ल्होसार मनाउने गर्दछन् । गुरुङहरूले तो ल्हो अर्थात बाघ वर्गलाई बिदा गरी हे ल्हो अर्थात बिरालो वर्गलाई स्वागत गर्दै ल्होसार मनाएका छन् । एकसातादेखि नै ल्होसारको रौनक छाएको लमजुङमा शुभकामना आदाप्रदान, चियापान, सांस्कृतिक कार्यक्रमका साथ ल्होसारको स्वागत तथा स्योकै लगायतका कार्यक्रम हुँदै आएका थिए । 

ल्होसारको मुख्य दिन शुक्रबार तमु ह्युला छोँज धि गुरुङ राष्ट्रिय परिषद् बेँसीशहर इकाईले वृहत शुभकामना आदानप्रदान तथा विविध सांस्कृतिक कार्यक्रम गरेको थियो । कार्यक्रममा नवनिर्वाचित प्रधिनिधिसभा सदस्य पृथ्वीसुब्बा गुरुङ र प्रदेशसभा सदस्य भेषबहादुर पौडेललाई इकाई, टोल समूहले सम्मान गरेका थिए ।  कार्यक्रमका अवसरमा बेँसीशहर इकाई अन्तर्गतका पाँच वटा टोल समूह, तमु प्लु संघ र तमु विद्यार्थी छोँज धिले जातीय भेषभुषासहित नृत्य प्रस्तुत गरेका थिए ।  कार्यक्रममा पाँच वटा टोलको फरकफरक परिकारसहित स्योकै कार्यक्रम समेत भएको थियो । 

सदरमुकाम बेँसीशहरसहित उदिपुर, चिसापानी भुजुङ, घनपोखरा, ताघ्रिङ, घेर्मु, पसगाउँ,  सिउरुङ, ढंगै, राईनास, पाचोक, इलमपोखरी लगायतका गाउँमा विविध कार्यक्रम गरी धुमधामका साथ ल्होसार मनाइएको छ ।