काठमाडौँ– नेपालका प्रधानमन्त्री शेरबहादुर देउवाको भारत भ्रमणको तालिका सार्वजनिक भएको छ ।
बिहीबार भारतीय विदेश मन्त्रालयले प्रधानमन्त्री देउवाको भ्रमण तालिका सार्वजनिक गरेको हो ।
तालिकाअनुसार प्रधानमन्त्री देउवा शुक्रवार दिउँसो नयाँ दिल्लीका लागि प्रस्थान गर्ने छन् । भारतीय समयअनुसार दिउँसो साढे २ बजे उनी नयाँ दिल्लीमा अवतरण गर्ने छन् ।
प्रधानमन्त्री देउवासँग पहिलो भेट भारतीय विदेशमन्त्री डा. एस जयशंकरसँग हुनेछ ।
होटल आईटीसी मौर्यमा उनलाई भेट्न डा. जयशंकर दिउँसो साढे ४ बजे आइपुग्ने छन् ।
शनिवार बिहान १०ः४० मा प्रधानमन्त्री देउवाले राजघाट पुगेर महात्मा गान्धीको समाधिस्थलमा माल्यार्पण गर्ने कार्यक्रम छ ।
देउवा ११ः१० बजे हैदरावाद हाउस पुग्ने छन् ।
प्रधानमन्त्रीद्वयको द्विपक्षीय भेटवार्ता दिउँसो १२ः१५ बजे हैदरावाद हाउसमा हुनेछ ।
भेटवार्तापछि जयनगर–कुर्था रेलको शुभारम्भ गरिनेछ ।
द्विपक्षीय सम्झौताको आदानप्रदान र प्रधानमन्त्रीहरूले संयुक्तरूपमा प्रेस वक्तव्य जारी गर्ने कार्यक्रम पनि तय भएको छ ।
शनिवार दिउँसो ४ः३० बजे भारतका उपराष्ट्रपति वेन्कैया नायडूसँग देउवाको भेटवार्ता हुनेछ ।
आइतवार बिहान ९ बजे बनारसमा हुने कार्यक्रममा सहभागी हुन त्यसतर्फ प्रस्थान गर्ने कार्यक्रम तय भएको छ ।
प्रधानमन्त्री देउवा दिउँसो ४ बजे दिल्ली फर्किने र सवा ४ बजे स्वदेश फर्किने तालिका सार्वजनिक भएको छ ।
प्रतिक्रिया