काठमाडौं। इन्डियन प्रिमियर लिग (आईपीएल)मा कोलकत्ता नाइट राइडर्सलाई पराजित गर्दै रोयल च्यालेन्जर्स बैंगलोरले पहिलो जित दर्ता गरेको छ।

बुधबार राति भएको खेलमा कोलकत्तालाई बैंगलोरले ३ विकेट हराएको हो।

कोलकत्ताले दिएको १२९ रनको चुनौती बैंगलोरले १९ ओभर २ बलमा ७ विकेट गुमाएर पूरा गरेको हो। बैंगलोरको जितमा शेर्फान रुथरफोर्डले सर्वाधिक २८ बनाए। शाहबाज अहमेद २७, डेभिड विलि १८ र विराट कोहलीले १२ बनाउँदा दिनेश कार्तिक १४ र हर्सल पटेल १० रनमा अविजित रहे।

कोलकत्ताका टिम साउथीले ३ र उमेश यादवले २ विकेट लिए। पहिले ब्याटिङ गरेको कोलकत्ता १८ ओभर ५ बलमा अलआउट भएको थियो।

कोलकत्ताका आन्द्रे रसेल २५, उमेश यादवले १८, साम विलिङ्स १४, कप्तान श्रेयस एयर १३, सुनिल नारिने १२ रन बनाए। बैंगलोरका वानिन्दु हसरंगाले ४ विकेट लिए भने आकाश दीपले ३ र हर्सल पटेलले २ विकेट हात पारे।

जितसँगै बैंगलोरले २ खेलमा २ अंक जोडेको छ। पहिलो खेलमा बैंगलोरलाई पन्जाब किङ्सले ५ विकेटले हराएको थियो। कोलकत्ताले पहिलो खेलमा चेन्नई सुपर किङसलाई ६ विकेटले हराएको थियो।