काठमाडौँ- अफगानिस्तानमा पूर्ववर्ती सरकारको मातहतमा काम गरेका सुरक्षाकर्मीको रहस्यमय हत्याको क्रम अझै नरोकिएको पाइएको छ । अफगानिस्तानको खामा प्रेसले स्रोतलाई उद्धृत गर्दै तालिबानको शासनमा पूर्ववर्ती सरकारको मातहतमा काम गरेका सुरक्षाकर्मीको हत्या हुने क्रम अझै नरोकिएको उल्लेख गरेको हो ।

गत वर्षको अगस्ट महिनामा अफगानिस्तानको सत्ता कब्जा गरेपछि तालिबानले पूर्ववर्ती सरकारमा काम गरेका सबैलाई आममाफीको घोषणा गरेको थियो ।

तालिबानको घोषणाका बावजुद पूर्ववर्ती सरकारअन्तर्गत खटिएका सुरक्षाकर्मीलाई बेपत्ता बनाउने, उनीहरुको हत्या हुने क्रम अझै नरोकिएको अन्तर्राष्ट्रिय मानव अधिकारवादी संस्था ह्युमन राइट्स वाचले उल्लेख गरेको छ ।

संस्थाले अघिल्लो महिना मात्रै मुलुकमा पूर्ववर्ती सरकारको मातहतमा रहेको अफगान राष्ट्रिय सुरक्षा बल (एएनएसएफ) का ४७ सुरक्षाकर्मी, प्रहरी, गुप्तचर निकायका सदस्य र अर्धसैनिकको गैरन्यायिक हत्या गरिएको एवम् बेपत्ता पारिएको उल्लेख गरेको छ ।

अफगानिस्तानको गजनी, हेल्मण्ड, कन्दाहार र कुन्दुज प्रान्तमा यस्ता घटना बढी हुने गरेको भएपनि पाक्टिया, पाक्टिका, खोस्त प्रान्तमा पनि यस किसिमका घटना हुने गरेको पाइएको ह्युमन राइट्स वाचको प्रतिवेदनमा उल्लेख छ ।