काठमाडौँ- पाकिस्तानी सेनाले सैनिक विद्यालयमा पश्तो भाषामाथि प्रतिबन्ध लगाएको छ । स्थानीय सञ्चारमाध्यमका अनुसार पाकिस्तानी सेनाले सेनाद्वारा सञ्चालित सार्वजनिक विद्यालयहरुमा पश्तो भाषामाथि प्रतिबन्ध लगाएको हो ।

भारतीय समाचार संस्था एएनआईका अनुसार पाकिस्तानी सेनाको यस कदमसँगै पाकिस्तानको खैबर पख्तुनख्वा प्रान्तका विद्यालयहरुमा अध्ययनरत विद्यार्थीलाई पश्तो भाषा बोलेको खण्डमा जरिवाना तिराइने समेत चेतावनी दिइएको छ ।

सेनाको यस कदमको पाकिस्तानका पत्रकार एवम् राजनीतिक अगुवाहरुले आलोचना गरेका छन् ।

पश्तुन तहफुज अभियानका प्रमुख मन्जुर पश्तीनले विज्ञप्ति प्रकाशित गर्दै सञ्चारमाध्यम, पाठ्यक्रम, न्याय र राजनीतिमा पश्तो भाषा यसअघि नै प्रतिबन्धित रहेको टिप्पणी गर्दै विद्यालयहरुमा पनि यस भाषाको प्रयोगलाई निरुत्साहित गरिएको बताए । यद्यपि आफ्नो मातृभाषामाथि कसैले प्रतिबन्ध लगाउन नसक्ने समेत उनले बताएको एएनआईले उल्लेख गरेको छ ।

पाकिस्तानबाट प्रकाशित हुने डन अखबारका अनुसार पेशावर सहरसहित नौशेरा, स्वात, मलाकन्द, बुनेर डेरा इस्माइल खाँलगायत क्षेत्रका बुद्धिजीवी, जातीय संगठनहरुले पाकिस्तानमा पश्तो भाषाको संरक्षण गर्न बेलाबेला विभिन्न कार्यक्रमको समेत आयोजना गर्दै आएका छन् ।