काठमाडौँ : प्रतिनिधिसभा सांसद तथा नेपाली कांग्रेसका नेता अजय चौरासियाले कांग्रेसले सत्ता गुमाउनुमा सभापति शेरबहादुर देउवा मात्रै जिम्मेवार नभएको बताएका छन् । पार्टीका महामन्त्रीद्धय गगन थापा र विश्वप्रकाश शर्माले देउवामाथि अनेक आरोप लगाउँदा र कांग्रेस पारदर्शी बन्न खोज्दा सत्ता गुम्न पुगेको उनको टिप्पणी छ ।

खबरहबसँगको कुराकानीमा उनले एमाले र माओवादीको गठबन्धन केवल स्वार्थको गठजोड मात्रै भएको भन्दै केही समयपछि फेरि नेपाली कांग्रेसले सत्ताको नेतृत्व गर्ने सम्भावना रहेको पनि बताए ।

‘अहिले जसरी देउवालाई झुक्याएर ओली र प्रचण्डले गठबन्धन गरेका छन्, त्यो केवल सत्ता स्वार्थ मात्रै हो । यो दिगो हँुदैन’ उनले खबरहबसँग भने, ‘फेरि कांग्रेसले सत्ता गुमाउनुमा सभापति देउवा मात्रै जिम्मेवार छैनन् । अरु पनि दोषी छन् । यो विषयमा व्यापक छलफल हुनुपर्छ ।’

संसदीय दलको चुनाव हारेपछि महामन्त्री गगन थापाले गोप्य कोठाभित्रको सहमति स्वीकार्य नहुने बताएपछि देउवा पारदर्शी भएर अघि बढ्न खोज्दा प्रचण्डले धोका दिन पुगेको चौरासियाको टिप्पणी छ ।

कांग्रेस नेता कार्यकर्ताले धैर्यता राख्नुपर्ने भन्दै अबका दिनमा कांग्रेसले आफूलाई सुधार गर्ने र फेरि सत्तामा जाने सम्भावना कायमै रहेको पनि चौरासियाले बताए ।