काठमाडौँ – गत जेठ १३ बाट प्रदर्शनरत फिल्म ‘कबड्डी ४ : द फाइनल म्याच’ ले अझैँ पनि राम्रो व्यापार गरिरहेको छ । पछिल्लो समय रिलिज भएका फिल्मको तुलनामा ‘कबड्डी ४’ कै अकुपेन्सी राम्रो रहेको हल सञ्चालक बताउँछन् ।

फिल्मले नेपालको हलमा २३ करोडको हाराहारीका ग्रस कलेक्सन गरिरहँदा डायस्पोरामा पनि उत्साहजनक नै छ । विदेशका अधिकांश शो सोल्ड आउट भएका छन् । राइट्स खरिद गर्ने सम्पूर्ण नाफामा छन् । यद्यपि छिमेकी मुलुक भारतमा भने ‘कबड्डी ४’ ले बल्ल प्रदर्शन आरम्भ गर्दैछ । एक करोड तीस लाखमा बेचिएको फिल्म सिक्किम राज्यमा रिलिज नहुँदा निर्माता मारमा छन् । उनीहरुले फिल्मको मुनाफा थाहा पाएका छैनन् ।

‘कबड्डी ४’लाई भारतको सबैभन्दा ठूलो र प्रतिष्ठित सिनेमा चेन पीभीआरले देशव्यापी रिलिज गर्ने भएको छ । पीभीआरले रामबाबु गुरुङ निर्देशित फिल्मलाई शुक्रबारदेखि आफ्ना भारतीय आउटलेटमा प्रदर्शन गर्न लागेको हो । पीभीआरले आफ्नो अफिसियल वेबसाइटमा ‘कबड्डी ४’ शुक्रबार रिलिज हुन लागेको जानकारी दिएको छ ।

भारतका ७० सहरमा पीभीआरका १७० भन्दा बढी पर्दा छन् । सिक्किमबाहेकका भारतीय राज्यमा ‘कबड्डी ४’ रिलिज हुन लागेको हो ।