काठमाडौँ– भारतीय निजी कम्पनी टाटाले अमेरिकी विमान कम्पनी एअरबससँग मिलेर भारतीय सेनाका लागि सैनिक विमान बनाउने भएको छ । टाटा र एअरबस मिलेर भारतमै भारतीय वायुसेनाका लागि सी–२९५ पारवहन विमान निर्माण गर्न लागेका हुन् ।

२ खर्ब १९ अर्ब भारतीय रुपैयाँको लगानीमा गुजरात राज्यमा विमान निर्माण गर्न लागिएको हो । आइतबार भारतीय प्रधानमन्त्री नरेन्द्र मोदीले यसको उद्घाटन गर्ने कार्यक्रम रहेको जनाइएको छ ।

‘निजी कम्पनीले भारतमा सैनिक विमान बनाउने यस्तो परियोजना भारतमै पहिलो हो ।’ भारतीय रक्षा मन्त्रालयले जारी गरेको विज्ञप्तिमा उल्लेख गरिएको छ । हाल भारतमा राज्यसञ्चालित हिन्दूस्तान एरोनोटिक्सले मात्र भारतमा सैनिक विमान बनाउँदै आएको छ ।

भारतले आफ्ना लागि हतियार एवम् रक्षा उपरकणका लागि रुसजस्ता मुलुकमा भर पर्दै आएको छ । यद्यपि मोदीले पछिल्ला केही वर्षयता अन्तर्राष्ट्रिय आयात घटाउने एवम् स्वदेशमै उत्पादनलाई बढावा दिने नीति लिएका छन् ।